LITIKO LETEBUCIKO NEMASIKO
LUHLAKA LWENCHUBOMGOMO YELUPHIKO LWETILWIMI LWAVELONKHE
Kungani kufanele kube neluHlaka lwenChubomgomo yeluLwimi yaVelonkhe?
Luhlaka lwenchubomgomo yelulwimi yavelonkhe luhlaka loluvumela inchubomgomo lenamatselene yekwabiwa kwetilwiminyenti ngekhatsi kwetakhiwo teMtsetfosisekelo (uMtsetfo nombolo. 108 wanga-1996), ikakhulukati sigaba 6. Kuphindze kuhloswe ngalo kulekelela lendlela levisisekako yahulumende yekwakha sive kanye nekusebentisa imitfombolusito yelive letfu.
Tinjongo
Kutfutfukisa kusetjentiswa ngalokulinganako kwaletilwimi letingu-11 letisemtsetfweni.
Kwenta lula kufinyelela ngalokulinganako kutinsita tahulumende, lwati kanye nemininingwano;
Kucinisekiswa kwekubuyiswa kwetilwimi tendzabuko letisemtsetfweni lebetibandlululwa ngaphambilini;
Kucala kanye nekusimamisa inshumayelo lenemdlandla yebulwiminyenti kumiphakatsi yelulwimi;
Kukhutsata kufundvwa kwaletinye tilwimi letisemtsetfweni tendzabuko kanye ne-
Kukhutsata kuphatfwa kahle kwelulwimi kwntelwa kuphatfwa kahle kwemisebenti yemphakatsi.
Imigomosisekelo
Kutfutfukisa kulingana kwetilwimi nemalungelo etilwimi njengobe kudzingeka ngekwentsandvo yelinyenti;
Tilwimi njengemtfombolusito wekwandzisa lwati, bucwephesha kanye nekubamba lichaza ngalokugcwele kutembusave kanye nemikhakha yetemphilo netemnotfo
Bungani bekubambisana kutfutfukisa bulwiminyenti lobuhambelana nemtsetfosisekelo.
Kuvimbela kusetjentiswa kwanobe ngabe nguluphipo lulwimi ngetinjongo tekucaphata, tekubusa kanye nekubandlulula, kanye
Nekukhulisa kucatjangwa kwebantfu uma kwentiwa tintfo letitsandvwa bantfu, tidzingo kanye netifiso temiphakatsi yelulwimi leminyenti ngekukhulumisana kanye netinkhulumo-mphikiswano letichubekako.
Indlela yekwenta
Bakhulumi betilwimi tendzabuko letatibandlululwa ngaphambilini baniketwa emandla mayelana nelwati kanye nemakhono latfolakala kulemiphakatsi;
Lenchubo yekubeka phambili tindzawo letitsite tekutfutfukiswa kwelulwimi kutawuwenteka ngekubambisana lokukhulu nemiphakatsi yelulwimi;
Kubambisana nemave lase-Afrika leseNingizimu lekwabelwana nawo tilwimi letingasemnceleni kutawentiwa ngenjongo yekukhulisa kutfutfukiswa kwelulwimi nekuphatfwa, kanye
Nendlela lesuselwa emphakatsini kutfutfukisa bulwiminyenti itawulandzelwa, kubophelela lwati lwebucwepheshe ngenjongo yekudluliselwa kwelwati kanye nemakhono.
Bubanti
Yonkhe imitimba yahulumende kanye netikhungo temphakatsi letenta umsebenti wemphakatsi ngekwemtsetfo tiboshwe ngulomgomo. Tifundza titawenta tinchubomogomo tato ngekulandzela loluhlaka, ngekunaka timeko tetigodzi netidzingo temiphakatsi kanye nalabakutsandzako. Bohulumende basemakhaya batawuncuma inchubomgomo ngekhatsi kweluhlaka kwaleso sifundza lesitsintsekako. Kusetjentiswa kwelulwimi emitimbeni yahulumende kutawuba ngaleluhlobo:
Tilwimi letisebentako / tilwimi temibhalo: Lowo nalowo mtimba wahulumende kumele uvumelane ngelulwimi lolusebentako (ngetinjongo tekuchumana tangekhatsi kwelitiko kanye nalamanye ematiko): uma kungukutsi lapho kukhonakala khona, kute umuntfu longavinjelwa ekusebentiseni lolulwimi lwakhe lalikhetsile, sibonelo, ngetinjongo tekubamba imihlangano nobe kwenta imisebenti letsite.
Kuchumana nemalunga emphakatsi: Ngetinjongo tekubhalelana ngalokusemtsetfweni, lulwimi lolukhetfwe takhamuti kumele tisetjentiswe. Konkhe kuchumana ngekwemlomo kumele kwenteka ngelulwi lolusemtsetfweni lolukhetfwe ngulabantfu lolucondziswe kubo.
Kuchumana nemhlaba jikelele kutawuba nesiNgisi nobe ngalolulwimi lolukhetsiwe lalamave nobe tinhlangano letitsintsekako.
Kwakha umtsamo weluntfu
Njengobe kusetjentiswa kwenChubomgomo yeluLwimi kutawungeta kufuneka ngemandla kwemisebenti yekuhumusha, kuhlela kanye nekutolika, tinhlelo letengetiwe temakhono titawentiwa kutsi tibe khona.
Luphiko lwetiLwimi lwaVelonkhe lutawuhlelembisa tinhlelo tekuceceshwa kwebasebenti belulwimi futsi lumise tinkhombandlela tekusebenta ngekhwalithi.
Emagumbi etilwimi atawumiswa ematikweni ahulumende kuphatsa kusetjentiswa kwalenchubomgomo.
Kutfutfukiswa kwetheminoloji etilwimini lesemtsetfweni kanye neliBhange lemaThemu laVelonkhe kutawuphutfunyiswa.
Kwakha umtsamo weluntfu netakhiwoncanti lapho kusetjentiswa khona iTheknoloji yeluLwimi leLuntfu kutawutsintseka.
Kubambisana lokukhulu kutawenteka netindzawo tekufundza letisezingeni lelisetulu letiniketa tinhlelo letamukelekile te-SAQA ekufundzeni lulwimi.
Emasu ekusetjentiswa
Lenchubomgomo itawungeniswa ngendlela lechubekako, wesikhashane, losemkhatsini kanye newesikhatsi lesidze.
Lomgomo utawubuyeketwa ngalokwetayelekile njengobe kudzingekile.
Uma ufuna lwati lolengetiwe:
Umcondzisi lomKhulu: Luphiko lwetiLwimi lwaVelonkhe
Lucingo: +27 12 337-8081
Inhloko: Kuhlelwa kweluLwimi
Lucingo: +27 12 337-8366
Inhloko: Kuhumusha nekuHlela (Tilwimi tase-Afrika)
Lucingo: +27 12 337-8301
Lucingo: +27 12 337-8580
Inhloko: Kuhlelenjiswa kweTheminoloji
Lucingo: +27 12 337-8345
Lucingo:
Luphiko lwetiLwimi lwaVelonkhe
Sakaposi x195
IFeksi: +27 12 324-2119
Lomculu uyatfolakala ngato tonkhe tilwimi letisemtsetfweni.
